രാജ്യസഭാ എംപിയായി സത്യപ്രതിജ്ഞ ചെയ്യുന്നതിനു മുമ്പ് ഉലകനായകന്‍ കമല്‍ഹാസന്‍ സ്റ്റൈല്‍ മന്നന്‍ രജനികാന്തുമായി കൂടിക്കാഴ്ച നടത്തി. തന്റെ കൂടിക്കാഴ്ചയുടെ ചിത്രങ്ങള്‍ കമല്‍ഹാസന്‍ തന്റെ ഔദ്യോഗിക എക്‌സ് ഹാന്‍ഡിലില്‍ പോസ്റ്റ് ചെയ്തു. തന്നെ രാജ്യസഭ അംഗമായി തെരഞ്ഞെടുത്ത ഉത്തരവു രജനികാന്തിനു സമര്‍പ്പിക്കുന്നതും ചിത്രത്തിലുണ്ട്. രജനികാന്തിന് കമല്‍ഹാസന്‍ പൂച്ചെണ്ട് സമ്മാനിക്കുന്നതും ഇന്ത്യന്‍ വെള്ളിത്തിരയിലെ അതുല്യതാരങ്ങള്‍ ഊഷ്മളമായ ആലിംഗനം പങ്കിടുന്നതുമായ ചിത്രങ്ങള്‍ ആരാധകര്‍ ഏറ്റെടുത്തു.
രജനികാന്തും കൂടിക്കാഴ്ചയുടെ ചിത്രങ്ങള്‍ സോഷ്യല്‍ മീഡിയ അക്കൗണ്ടിലൂടെ പങ്കുവച്ചിട്ടുണ്ട്. തന്റെ പ്രിയ സുഹൃത്തിന്റെ നേട്ടത്തില്‍ താരം കമല്‍ഹാസനെ അഭിനന്ദിച്ചു. ‘രാജ്യസഭാംഗമായി സ്ഥാനമേല്‍ക്കുന്ന എന്റെ പ്രിയ സുഹൃത്ത്… അദ്ദേഹത്തിന് ഹൃദയംഗമമായ അഭിനന്ദനങ്ങള്‍…’ എന്നാണ് ചിത്രങ്ങള്‍ പങ്കുവച്ചുകൊണ്ട് രജനികാന്ത് കുറിച്ചത്. ഇരുവരുടെയും പോസ്റ്റുകള്‍ ലക്ഷക്കണക്കിന് ആരാധകരാണ് ഏറ്റെടുത്തത്.
മക്കള്‍ നീതി മയ്യം എന്ന രാഷ്ട്രീയ പാര്‍ട്ടിയുടെ സ്ഥാപകനാണ് കമല്‍ഹാസന്‍. തമിഴ്നാട്ടില്‍നിന്ന് രാജ്യസഭയിലേക്ക് എതിരില്ലാതെ തെരഞ്ഞെടുക്കപ്പെട്ട ആറുപേരില്‍ ഒരാളാണ് അദ്ദേഹം. ജൂലൈ 25ന് കമല്‍ ഹാസന്‍ രാജ്യസഭ അംഗമായി സത്യപ്രതിജ്ഞ ചെയ്യും.
ഏറെ വിവാദമായ തഗ് ലൈഫ് ആണ് കമല്‍ഹാസന്റെ അവസാനമായി തിയറ്ററുകളിലെത്തിയ ചിത്രം. ഇന്ത്യന്‍ 3- ആണ് താരത്തിന്റേതായി അണിയറയില്‍ ഒരുങ്ങുന്ന ചിത്രം.
