തെലങ്കാന : തെലങ്കാന ഫാർമ യൂണിറ്റിൽ ഉണ്ടായ സ്ഫോടനത്തെ തുടർന്ന് കാണാതായ ഒമ്പത് പേർക്കായുള്ള തിരച്ചിൽ തുടരുന്നു. ജൂൺ 30 നാണു 38 പേരുടെ മരണത്തിനിടയാക്കിയ സ്ഫോടനം തെലങ്കാനയിലെ പശമൈലാറമിലുള്ള സിഗാച്ചി ഇൻഡസ്ട്രീസ് ഫാർമസ്യൂട്ടിക്കൽ യൂണിറ്റിൽ നടന്നത്. ഒമ്പത് പേരെ ഇതുവരെ കണ്ടെത്താനായിട്ടില്ല, തിരിച്ചറിയുന്നതിനായി ഫോറൻസിക് സംഘങ്ങൾ കണ്ടെടുത്ത മനുഷ്യാവശിഷ്ടങ്ങൾ പരിശോധിച്ചുവരികയാണെന്ന് അധികൃതർ ഇന്ന് അറിയിച്ചു.
സ്ഥലത്തെ അവശിഷ്ടങ്ങളുടെ 90 ശതമാനവും നീക്കം ചെയ്തതായി ജില്ലാ പോലീസ് സൂപ്രണ്ട് പരിതോഷ് പങ്കജ് സ്ഥിരീകരിച്ചു, മൃതദേഹങ്ങൾ കണ്ടെത്താനാകുമെന്ന് പ്രതീക്ഷിക്കുന്നില്ല. എന്നിരുന്നാലും, ശുചീകരണ വേളയിൽ ഭാഗികമായ അവശിഷ്ടങ്ങൾ ഇനിയും പുറത്തുവന്നേക്കാമെന്ന് അദ്ദേഹം കൂട്ടിച്ചേർത്തു.മരണസംഖ്യ 38 ആയി തുടരുന്നു. ഒമ്പത് പേരെ കാണാതായിട്ടുണ്ട്. പക്ഷേ, ഇന്നോ നാളെയോ, എഫ്എസ്എല്ലിൽ (ഫോറൻസിക് സയൻസ് ലാബ്) നിന്ന് അസ്ഥികളുടെയും മറ്റും റിപ്പോർട്ടുകൾ ലഭിച്ചുകഴിഞ്ഞാൽ, കാര്യങ്ങൾ വ്യക്തമാകും -എന്ന് എസ്പി പറഞ്ഞു.
അതേസമയം, സംസ്ഥാന സർക്കാർ നിയോഗിച്ച വിദഗ്ദ്ധ സമിതി ഇന്ന് സ്ഫോടന സ്ഥലം സന്ദർശിക്കും. സിഎസ്ഐആർ–ഇന്ത്യൻ ഇൻസ്റ്റിറ്റ്യൂട്ട് ഓഫ് കെമിക്കൽ ടെക്നോളജിയിലെ എമെരിറ്റസ് സയന്റിസ്റ്റ് ഡോ. ബി വെങ്കിടേശ്വര റാവുവിന്റെ നേതൃത്വത്തിലുള്ള പാനലിനെ, ദുരന്തത്തിലേക്ക് നയിച്ച സംഭവങ്ങളുടെ കാരണം തിരിച്ചറിയാൻ ചുമതലപ്പെടുത്തിയിട്ടുണ്ട്.
ശുപാർശകളും പരിഹാര നടപടികളും ഉൾക്കൊള്ളുന്ന റിപ്പോർട്ട് ഒരു മാസത്തിനുള്ളിൽ കമ്മിറ്റി സമർപ്പിക്കുമെന്ന് പ്രതീക്ഷിക്കുന്നു.
പരിക്കേറ്റവരിൽ ചിലർ വിവിധ ആശുപത്രികളിൽ ചികിത്സയിലാണെങ്കിലും, ഇവരിൽ പലരെയും ഇന്ന് തന്നെ ഡിസ്ചാർജ് ചെയ്യാൻ സാധ്യതയുണ്ടെന്നും ജില്ലാ ഉദ്യോഗസ്ഥർ പറഞ്ഞു.
സംസ്ഥാനത്തെ സമീപകാലത്തെ ഏറ്റവും മാരകമായ വ്യാവസായിക ദുരന്തങ്ങളിലൊന്നായ സ്ഫോടനം, കെമിക്കൽ, ഫാർമസ്യൂട്ടിക്കൽ നിർമ്മാണ മേഖലയിലെ സുരക്ഷാ മാനദണ്ഡങ്ങളിലേക്ക് കൂടുതൽ ശ്രദ്ധ ആകർഷിച്ചിട്ടുണ്ട് .പൊതുജനങ്ങളുടെ വിമർശനത്തിനും തൊഴിലാളികളുടെ ആരോപണങ്ങൾക്കും മറുപടിയായി, സിഗാച്ചി ഇൻഡസ്ട്രീസ് മാനേജിംഗ് ഡയറക്ടറും സിഇഒയുമായ അമിത് രാജ് സിൻഹ ബുധനാഴ്ച കമ്പനിയിൽ കാലഹരണപ്പെട്ട ഉപകരണങ്ങൾ ഉപയോഗിച്ചുവെന്ന അവകാശവാദം നിഷേധിച്ചു. മരിച്ചവരുടെ കുടുംബങ്ങൾക്ക് ഒരു കോടി രൂപ വീതം നഷ്ടപരിഹാരം നൽകുമെന്നും അദ്ദേഹം പ്രഖ്യാപിച്ചു
