ന്യൂഡൽഹി: രാജ്യത്ത് ഏപ്രിൽ-ജൂൺ പാദത്തിൽ സ്വർണ്ണ ഡിമാൻഡ് 10 ശതമാനം കുറഞ്ഞ് 134.9 ടണ്ണായി. കഴിഞ്ഞ വർഷം ഇതേ പാദത്തിൽ ഇത് 149.7 ടണ്ണായിരുന്നു എന്ന് വേൾഡ് ഗോൾഡ് കൗൺസിൽ (ഡബ്ല്യുജിസി) വ്യാഴാഴ്ച അറിയിച്ചു.
സ്വർണ്ണ മൂല്യത്തിന്റെ കാര്യത്തിൽ, ഈ വർഷത്തിന്റെ രണ്ടാം പാദത്തിൽ സ്വർണ്ണത്തിന്റെ ആവശ്യകത 30 ശതമാനം വർധിച്ച് 1,21,800 കോടി രൂപയായി. 2024 ലെ ഇതേ കാലയളവിൽ ഇത് 93,850 കോടി രൂപയായിരുന്നു. 2024 ലെ ഇതേ പാദത്തിലെ 106.5 ടണ്ണുമായി താരതമ്യം ചെയ്യുമ്പോൾ, അവലോകന പാദത്തിൽ സ്വർണ്ണത്തിന്റെ ആവശ്യകത 17 ശതമാനം കുറഞ്ഞ് 88.8 ടണ്ണായി. എന്നിരുന്നാലും, ആഭരണങ്ങളുടെ മൂല്യം 2024 ഏപ്രിൽ-ജൂൺ പാദത്തിൽ രേഖപ്പെടുത്തിയ 66,810 കോടി രൂപയിൽ നിന്ന് 20 ശതമാനം വർദ്ധിച്ച് 80,150 കോടി രൂപയായി.
2025 ലെ രണ്ടാം പാദത്തിൽ ഇന്ത്യയുടെ സ്വർണ്ണ വിപണിയുടെ പ്രകടനം പരിശോധിക്കുമ്പോൾ, ഭൗതിക സ്വർണ്ണത്തിന്റെ ആവശ്യകതയിൽ 10 ശതമാനം കുറവ് വന്നിട്ടും, മൂല്യം 30 ശതമാനം വർദ്ധിച്ചതായി കാണാം എന്ന് വേൾഡ് ഗോൾഡ് കൗൺസിൽ റീജിയണൽ സിഇഒ (ഇന്ത്യ) സച്ചിൻ ജെയിൻ പറഞ്ഞു.
ആഗോളതലത്തിൽ ഔൺസിന് ശരാശരി ത്രൈമാസ വില 3,280.4 യുഎസ് ഡോളറിലും 10 ഗ്രാമിന് ആഭ്യന്തര വില 90,306.8 രൂപയിലും എത്തിയതോടെ സ്വർണ്ണത്തിന്റെ വിലയിലും വർദ്ധനവ് ഉണ്ടായി. ഇത് ആളുകൾക്കിടയിൽ സുരക്ഷിതമായ ഒരു ആസ്തി എന്ന നിലയിൽ സ്വർണ്ണം വാങ്ങുന്നതിനു താല്പര്യം കൂട്ടിയെന്നും ജെയിൻ പറഞ്ഞു.
ജനുവരി മുതൽ ജൂൺ വരെയുള്ള കാലയളവിൽ ആകെ സ്വർണ്ണ ഡിമാൻഡ് ഏകദേശം 253 ടൺ ആയിരിക്കുന്നതിനാൽ, വാർഷികാടിസ്ഥാനത്തിൽ 600 ടണ്ണിനും 700 ടണ്ണിനും ഇടയിലായിരിക്കുമെന്ന് വേൾഡ് ഗോൾഡ് കൗൺസിൽ വിലയിരുത്തുന്നു. വില സ്ഥിരതയുണ്ടെങ്കിൽ, അത് 700 ടണ്ണിന്റെ ഉയർന്ന തലത്തിലായിരിക്കണം. എന്നിരുന്നാലും, വില നിലവിലെ കുതിപ്പ് തുടരുകയാണെങ്കിൽ, അത് ഒരു ഇരുണ്ട സാധ്യതയാണ്, ഡിമാൻഡ് വീണ്ടും താഴാം ജെയിൻ കൂട്ടിച്ചേർത്തു.
വിതരണത്തിന്റെ കാര്യത്തിൽ, ഇന്ത്യയിലേക്കുള്ള സ്വർണ്ണത്തിന്റെ ഇറക്കുമതി 34 ശതമാനം കുറഞ്ഞ് 102.5 ടണ്ണായി. 2024 ലെ ഇതേ കാലയളവിൽ ഇത് 150 ടണ്ണായിരുന്നു. രണ്ടാം പാദത്തിൽ സ്വർണ്ണ പുനരുപയോഗം 1 ശതമാനം കുറഞ്ഞ് 23.1 ടണ്ണായി. ഇതേ കാലയളവിൽ ഇത് 2 ടണ്ണായിരുന്നു. മറുവശത്ത്, ആഗോളതലത്തിൽ സ്വർണ്ണത്തിന്റെ ആവശ്യകത കഴിഞ്ഞ വർഷത്തെ അപേക്ഷിച്ച് 3 ശതമാനം വർദ്ധിച്ച് 1,249 ടണ്ണായി. ഉയർന്ന വില സാഹചര്യത്തിനിടയിലും ഡിമാൻഡ് വർധിക്കുകയാണുണ്ടായത്.
