പ്രിയ ശ്രീനിവാസൻ
ഡൽഹി : ഇന്ത്യയിലെ കാമ്പസ് ആത്മഹത്യകൾ ഭയപ്പെടുത്തുന്ന എണ്ണത്തിൽ കൂടുതലായിട്ടും അധികാരികൾ മുഖം തിരിച്ചു നിൽക്കുന്ന അവസ്ഥ പുതു തലമുറയെ ഭീതിപ്പെടുത്തുന്നു.ഓരോ മരണവും മരുഭൂമിയിലെ ഓരോ നിലവിളിയാണ്. ഒരു രാഷ്ട്രമെന്ന നിലയിൽ നമ്മെയെല്ലാം ഒന്നിച്ച് വേട്ടയാടേണ്ട നിശബ്ദ നിലവിളി.
ക്യാമ്പസുകളിലെ വിദ്യാർത്ഥികളുടെ മാനസികാരോഗ്യ ആശങ്കകൾ പരിഹരിക്കുന്നതിലും അവർ സ്വന്തം ജീവൻ എടുക്കുന്ന അങ്ങേയറ്റത്തെ നടപടിയിലേക്ക് കടക്കുന്നത് തടയുന്നതിലും നിലവിലുള്ള നിയമപരമായ ചട്ടക്കൂടുകളുടെ കാര്യക്ഷമതയില്ലായ്മയുടെ, ഭീകരമായ ഓർമ്മപ്പെടുത്തലായി ഓരോ കാമ്പസ് ആത്മഹത്യകളും നടന്നുകൊണ്ടേയിരിക്കുന്നു.
രാജ്യത്തെ യുവാക്കളുടെ സ്വപ്ന കേന്ദ്രമായ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി)കളുമായി ബന്ധപ്പെട്ട ഗ്ലാമറിന്റെയും അന്തസ്സിന്റെയും പുറംമോടിക്ക് പിന്നിൽ അസ്വസ്ഥതയുണ്ടാക്കുന്ന ഒരു യാഥാർത്ഥ്യമുണ്ട്. വിദ്യാർത്ഥി ആത്മഹത്യകളുടെ ഉയർന്ന നിരക്ക്. ലോകത്തിലെ ഏറ്റവും കഠിനമായ മത്സര പരീക്ഷകളിൽ ഒന്നിൽ വിജയിച്ച ശേഷം, വളരെയേറെ സ്വപ്‌നങ്ങൾ നെയ്തുകൂട്ടിയാണ് വിദ്യാർത്ഥികൾ ഈ കാമ്പസുകളിലേക്ക് കാലെടുത്തുവയ്ക്കുന്നത്. എന്നാൽ ഒടുവിൽ അവർ കടന്നുപോകുന്നത് സങ്കൽപ്പിക്കാൻ പോലും സാധിക്കാത്ത ട്രോമകളിലൂടെയാണ് .
ഞെട്ടിപ്പിക്കുന്ന ഔദ്യോഗിക കണക്കുകൾ മനുഷ്യ മനസ്സാക്ഷിയുടെ ഉറക്കം കെടുത്തും. 2005 നും 2024 നും ഇടയിൽ ഐഐടികളിൽ 127 ആത്മഹത്യകൾ നടന്നു. ഏറ്റവും കൂടുതൽ ആത്മഹത്യകൾ രേഖപ്പെടുത്തിയത് മദ്രാസ് ഐഐടിയിലാണ് 26 വിദ്യാർത്ഥികളാണ് മദ്രാസ് ഐഐടിയിൽ ആത്‍മഹത്യ ചെയ്തത്. തൊട്ടുപിന്നാലെ ഐഐടി കാൺപൂർ (18), ഐഐടി ഖരഗ്പൂർ (14), ഐഐടി ഗുവാഹത്തി (13), ഐഐടി ബോംബെ, ഐഐടി ഡൽഹി എന്നിവിടങ്ങളിൽ 10 വീതം ആത്മഹത്യകൾ റിപ്പോർട്ട് ചെയ്തിട്ടുണ്ട്. 2018 ജനുവരി മുതൽ 2023 മാർച്ച് വരെയുള്ള കാലയളവിൽ ഐഐടികളിൽ നിന്ന് കുറഞ്ഞത് 33 വിദ്യാർത്ഥി ആത്മഹത്യകൾ റിപ്പോർട്ട് ചെയ്യപ്പെട്ടതായി കഴിഞ്ഞ വർഷം കേന്ദ്ര വിദ്യാഭ്യാസ മന്ത്രാലയം പാർലമെന്റിനെ അറിയിച്ചു.
ഈ വർഷം മാത്രം ഖരഗ്പൂർ കാമ്പസിൽ മൂന്ന് വിദ്യാർത്ഥികളുടെ ആത്മഹത്യകൾ റിപ്പോർട്ട് ചെയ്യപ്പെട്ടു.വിദ്യാർത്ഥി ആത്മഹത്യകൾ തണുത്ത സ്ഥിതിവിവരക്കണക്കുകളായി ചുരുങ്ങുകയും സമൂഹം ഈ ദുരന്തങ്ങൾക്ക് മുന്നിൽ കൂടുതൽ നിർവികാരമായി നിൽക്കുകയും ചെയ്യുന്നു എന്നതാണ് ഏറ്റവും ഭയാനകമായ കാര്യം.
കടുത്ത മത്സരശേഷി ഉണർത്തുന്ന ഗ്രേഡിംഗ് സിസ്റ്റം, നിരന്തരമായ അക്കാദമിക് പ്രൊജെക്ടുകൾ , ജാതി, ലിംഗ വിവേചനം എന്നിവയാൽ അടയാളപ്പെടുത്തുന്ന സംസ്കാരം എന്നിവ അവരുടെ ജീവിതത്തെ ദുരിതപൂർണ്ണമാക്കുന്നു.നേരിടേണ്ടി വരുന്ന സമ്മർദ്ദം കൈകാര്യം ചെയ്യാൻ എല്ലാവരും സജ്ജരായിരിക്കണമെന്നില്ല.
വിദ്യാർത്ഥികൾക്ക് അനൗപചാരിക വൈകാരിക പിന്തുണ നൽകുന്നതിനായി കാമ്പസിൽ താമസിക്കുന്ന സ്ത്രീകളിൽ നിന്ന്, ഫാക്കൽറ്റി, നോൺ-ഫാക്കൽറ്റി വിഭാഗങ്ങളിൽ നിന്ന്, വനിതാ മെന്റർമാരെ നിയമിക്കുന്ന “കാമ്പസ് മദേഴ്‌സ്” സംരംഭം ആരംഭിക്കാനുള്ള ഐഐടി-ഖരഗ്പൂരിന്റെ നിർദ്ദേശം കുറച്ചു ആശ്വാസം തരുന്ന വാർത്തയാണ്. ദുരിതമനുഭവിക്കുന്ന വിദ്യാർത്ഥികൾക്ക് വൈകാരിക പിന്തുണയും മെന്റർഷിപ്പും നൽകുന്നതിന് വളണ്ടിയർമാർക്ക് പരിശീലനം നൽകും. കൗൺസിലിംഗിലും അനുബന്ധ കഴിവുകളിലും അവർക്ക് ഓറിയന്റേഷനും പരിശീലനവും ലഭിക്കും. കാമ്പസുകളിലെ മാനസികാരോഗ്യ പ്രതിസന്ധി തരണം ചെയ്യാൻ ഇത്തരം നിരവധി സംരംഭങ്ങൾ ഇനിയും ആവശ്യമാണ്.
ഉയർന്ന പ്രതീക്ഷ, സമപ്രായക്കാരുടെ സമ്മർദ്ദം, പഠന സമയക്രമങ്ങൾ പാലിക്കാൻ കഴിയാത്തത്, ഫാക്കൽറ്റിയുമായുള്ള വ്യക്തിപരമായ ഇടപെടലുകൾ , ഒറ്റപ്പെടലും ഏകാന്തതയും, ജാതി വിവേചനം, ക്യാമ്പസ് പ്ലേസ്‌മെന്റുകളെക്കുറിച്ചുള്ള അനിശ്ചിതത്വം എന്നിവയാണ് ക്യാമ്പസ് ആത്മഹത്യകൾ വർദ്ധിക്കുന്നതിന് കാരണമാകുന്ന പ്രധാന ഘടകങ്ങൾ.
നാഷണൽ ക്രൈം റെക്കോർഡ്സ് ബ്യൂറോ (എൻ‌സി‌ആർ‌ബി) റിപ്പോർട്ട് അനുസരിച്ച്, വിദ്യാർത്ഥികളുടെ ആത്മഹത്യകൾ മൊത്തത്തിലുള്ള ആത്മഹത്യാ പ്രവണതകളേക്കാൾ വേഗത്തിൽ വർദ്ധിക്കുകയും ദളിത്, ആദിവാസി, ഒ‌ബി‌സി വിദ്യാർത്ഥികളെ കഠിനമായി ബാധിക്കുകയും ചെയ്യുന്നു എന്നതാണ് . ഈ മരണങ്ങൾ വ്യക്തിപരമായ ദുരന്തങ്ങൾ മാത്രമല്ല ജാതി അടിസ്ഥാനമാക്കിയുള്ള ഒഴിവാക്കൽ, അക്കാദമിക് അകൽച്ച, ഭരണപരമായ നിസ്സംഗത എന്നിവയിൽ വേരൂന്നിയ വിദ്യാഭ്യാസ സ്ഥാപനങ്ങളുടെ പരാജയങ്ങളാണ്.
മികവാർന്ന പാഠ്യപദ്ധതി, തുടർച്ചയായ വിലയിരുത്തൽ രീതികൾ, ബാക്ക്‌ലോഗുകൾ കൈകാര്യം ചെയ്യുന്നതിനുള്ള ഘടനാപരമായ പിന്തുണ എന്നിവ അക്കാദമിക് സമ്മർദ്ദം കുറയ്ക്കുന്നതിന് വളരെയധികം സഹായിക്കും. സാമ്പത്തികമായും സാമൂഹികമായും അരികുവൽക്കരിക്കപ്പെട്ട പശ്ചാത്തലങ്ങളിൽ നിന്നുള്ളവർക്കും പലപ്പോഴും വിവേചനം നേരിടുന്നവർക്കും, ശക്തമായ പിന്തുണ അത്യാവശ്യമാണ്. കൂടാതെ കാമ്പസിൽ കർശനമായ വിവേചന വിരുദ്ധ നയങ്ങളുള്ള അദ്ധ്യാപകരടക്കം എല്ലാവർക്കും കർശനമായ കൗൺസിലിംഗ് നൽകണം.
ഐഐടി വിദ്യാർത്ഥികളിൽ 61 ശതമാനം പേരും വിശ്വസിക്കുന്നത് അക്കാദമിക് സമ്മർദ്ദമാണ് തങ്ങളെ ഇത്തരം തീവ്രമായ നടപടികളിലേക്ക് നയിക്കുന്ന പ്രധാന ഘടകങ്ങളിലൊന്നെന്ന്, എന്നാൽ ഒരു സർവേയിൽ 12 ശതമാനം പേർ തൊഴിൽ അരക്ഷിതാവസ്ഥയാണ് ഉത്തരവാദിയെന്ന് അഭിപ്രായപ്പെട്ടു. 10 ശതമാനം പേർക്ക് കുടുംബ പ്രശ്‌നങ്ങളുണ്ടെന്നും 6 ശതമാനം പേർ പീഡനത്തിന് പരാതിപ്പെട്ടതായും പറഞ്ഞു.
മുൻകാല ആത്മഹത്യാ സംഭവങ്ങൾ അന്വേഷിക്കാൻ സൈക്യാട്രിസ്റ്റുകൾ, സൈക്കോളജിസ്റ്റുകൾ, നിയമജ്ഞർ, സാമൂഹിക പ്രവർത്തകർ, പോലീസ് എന്നിവരടങ്ങുന്ന സ്വതന്ത്ര വിദഗ്ധരെ ഉൾപ്പെടുത്തി ഒരു കേന്ദ്രീകൃത അന്വേഷണ കമ്മീഷൻ സർക്കാർ രൂപീകരിക്കണം. നിർദ്ദിഷ്ട കമ്മീഷനിൽ ഒരു ഐഐടി ഡയറക്ടർമാരോ പ്രൊഫസർമാരോ ഉണ്ടാകരുത് എന്നതും നിബന്ധന ആക്കണം.
കഴിഞ്ഞ വർഷം മാർച്ചിൽ ഐഐടി ഡൽഹി രൂപീകരിച്ച 12 അംഗ വിദഗ്ധ സമിതി നിർദേശിച്ച സിജിപിഎ,കൂടുതൽ സഹാനുഭൂതിയുള്ള കാമ്പസ് നേതാക്കളെ തിരഞ്ഞെടുക്കുക, ഫാക്കൽറ്റി-വിദ്യാർത്ഥി ബന്ധങ്ങൾ ശക്തിപ്പെടുത്തുക; പക്ഷപാതം കുറയ്ക്കുന്നതിന് നിർബന്ധിത പൗര പഠനം, ഭരണപരമായ പ്രതികരണശേഷി എന്നിവ ഉൾപ്പെടുന്ന വിപുലമായ ഘടനാപരമായ കാമ്പസ് പരിഷ്കാരങ്ങൾ ശുപാർശ ചെയ്തിരുന്നു. ഈ ശുപാർശകൾ അക്ഷരംപ്രതി നടപ്പിലാക്കുമെന്ന് പ്രതീക്ഷിക്കുന്നു.
