ഐസിഐസിഐ ബാങ്ക് മിനിമം ശരാശരി ബാലൻസ് പരിധി ഉയർത്തി; പരിധി ലംഘിച്ചാൽ പിഴ

മുംബൈ: ഐസിഐസിഐ ബാങ്ക് മിനിമം ശരാശരി ബാലൻസ് പരിധി 50,000 രൂപയായി ഉയർത്തി. 2025 ഓഗസ്റ്റ് 1 മുതൽ നിയമം പ്രാബല്യത്തിൽ ഉണ്ട്. മെട്രോ, നഗര പ്രദേശങ്ങളിലെ ഉപഭോക്താക്കൾക്ക്, മിനിമം ശരാശരി ബാലൻസ് 10,000 ൽ നിന്ന് 50,000 രൂപയാക്കി. സെമി അർബൻ ശാഖകളിൽ, പുതിയ നിബന്ധന മിനിമം ബാലൻസ് 25,000 രൂപയാണ്.മുൻകാലങ്ങളിൽ അത് 5,000 രൂപയായിരുന്നു.
ഗ്രാമീണ ശാഖകളിൽ, മിനിമം ബാലൻസ് 2,500 ൽ നിന്ന് 10,000 രൂപ ആയി വർദ്ധിപ്പിച്ചു.
പെൻഷൻകാർക്ക് ഈ ചാർജുകളിൽ നിന്ന് ഇളവ് ലഭിക്കും.

ഗ്രാമീണ, അർദ്ധ നഗര പ്രദേശങ്ങളിലെ നിരവധി അക്കൗണ്ട് ഉടമകളെ ഈ കുത്തനെയുള്ള വർദ്ധനവ് ബാധിക്കും. ആവശ്യമായ ബാലൻസ് നിലനിർത്തുന്നതിൽ പരാജയപ്പെടുന്നതിന് പിഴ ഈടാക്കാനും സാധ്യതയുണ്ട്. ഇത് താഴ്ന്ന വരുമാനമുള്ള അക്കൗണ്ട് ഉടമകൾക്ക് തിരിച്ചടിയാവും.
ബാങ്കിന്റെ നിലവിലെ പോളിസി പ്രകാരം ആവശ്യമായ ഏറ്റവും കുറഞ്ഞ പ്രതിമാസ ശരാശരി ബാലൻസ് (MAB) നിലനിർത്തുന്നതിൽ പരാജയപ്പെടുന്ന ഉപഭോക്താക്കളിൽ നിന്ന് കുറവ് തുകയുടെ 6 ശതമാനം അല്ലെങ്കിൽ 500 രൂപ, ഏതാണോ കുറവ് അത് ഈടാക്കും.

ഫാമിലി ബാങ്കിംഗിന്റെ കാര്യത്തിൽ, ഒരു കുടുംബം യോഗ്യതാ മാനദണ്ഡങ്ങളുടെ 1.5 മടങ്ങ് ഇരട്ടി തുക നിലനിർത്തണം. അങ്ങനെ ചെയ്തില്ലെങ്കിൽ, സ്വന്തം MAB പാലിക്കാത്ത അംഗങ്ങൾക്ക് നോൺ-മെയിന്റനൻസ് ചാർജുകൾ വ്യക്തിഗതമായി ബാധകമാകും. എന്നിരുന്നാലും, ഉപഭോക്താവ് മാനദണ്ഡങ്ങൾ പാലിക്കുന്നുണ്ടെങ്കിൽ നിരക്കുകൾ ഒഴിവാക്കാവുന്നതാണ്.

ബാങ്കിന്റെ ഈ നീക്കം ഉപഭോക്താക്കളെ ആശയക്കുഴപ്പത്തിലാക്കിയിരിക്കുകയാണ്. അവരിൽ പലരും തങ്ങളുടെ ബാങ്കിംഗ് രീതികൾ പുനഃപരിശോധിക്കാൻ നിർബന്ധിതരാവുകയാണ്. പലരും കുറഞ്ഞ മിനിമം ബാലൻസ് ആവശ്യകതകളുള്ള ബാങ്കുകളിലേക്ക് മാറുകയോ അത്തരം പരിധികൾ നിർബന്ധമാക്കാത്ത അടിസ്ഥാന സേവിംഗ്സ് അക്കൗണ്ടുകൾ തിരഞ്ഞെടുക്കുകയോ ചെയ്യാൻ സാധ്യത ഏറെയാണ്. മറ്റുള്ളവർ ശരാശരി തുക നിലനിർത്താൻ അവരുടെ സാമ്പത്തിക കാര്യങ്ങളിൽ കൂടുതൽ ശ്രദ്ധിക്കേണ്ടി വരും.

കൂടാതെ, സാമ്പത്തിക കാരണങ്ങളാൽ ഉണ്ടാകുന്ന ഏതൊരു ECS/NACH ഡെബിറ്റ് റിട്ടേണിനും, ഓരോ തവണ റിട്ടേൺ വരുമ്പോഴും ബാങ്ക് 500 രൂപ ഈടാക്കും, അതേ മാൻഡേറ്റിന് പ്രതിമാസം മൂന്ന് ചാർജുകളുടെ പരിധി നിശ്ചയിക്കും എന്നാണ് ബാങ്ക് പറയുന്നത്. ഔട്ട്‌വേർഡ് ചെക്ക് റിട്ടേണുകൾക്ക് (ഉപഭോക്താവ് നിക്ഷേപിക്കുന്ന ചെക്കുകൾ), സാമ്പത്തിക കാരണങ്ങളാൽ തിരികെ നൽകിയാൽ ഓരോന്നിനും 200 രൂപ ഫീസ് ഈടാക്കും. ഒപ്പ് പരിശോധന ഒഴികെ, സാമ്പത്തിക കാരണങ്ങളുള്ള ഇൻവേർഡ് ചെക്ക് റിട്ടേണുകൾക്ക് 500 രൂപയും സാമ്പത്തികേതര കാരണങ്ങളാൽ 50 രൂപയും ഈടാക്കും. കൂടാതെ, മറ്റൊരു ബാങ്കിന്റെ എടിഎമ്മിലോ പോയിന്റ് ഓഫ് സെയിൽ (പിഒഎസ്) ടെർമിനലിലോ ഉള്ള ഒരു ഇടപാട് മതിയായ ബാലൻസ് ഇല്ലാത്തതിനാൽ നിരസിക്കപ്പെട്ടാൽ, ഓരോന്നിനും 25 രൂപ ഫീസ് ഈടാക്കും.