പത്തനംതിട്ട : കോന്നിയിലെ പാറമടയിൽ പണി നടക്കുന്നതിനിടെ കൂറ്റൻ പാറ ഹിറ്റാച്ചിക്ക് മുകളിൽ വീണ് വൻ അപകടം.പത്തനംതിട്ട കോന്നി പയ്യനാമൺ ചെങ്കുളത്ത് പാറമടയിൽ അപകടം.
ഹിറ്റാച്ചിക്ക് മുകളിൽ പാറ വീണാണ് അപകടം ഉണ്ടായത്.തൊഴിലാളികൾ കുടുങ്ങിക്കിടക്കുന്നതായാണ് പ്രാഥമിക വിവരം.ഇവരെ പുറത്തെടുക്കാൻ ശ്രമം തുടങ്ങി.ഇന്ന് വൈകുന്നേരം മൂന്നു മണിക്കാണ് സംഭവം നടന്നത്.
പണി നടക്കുന്നതിനിടെ പാറ വാഹനത്തിന് മുകളിലേക്ക് വീഴുകയായിരുന്നു. രണ്ട് ഒഡീഷ സ്വദേശികളായ തൊഴിലാളികൾ മഹാദേവ്, അജയ് റായ് എന്നിവ‍ർ കുടുങ്ങിക്കിടക്കുന്നതായാണ് പ്രാഥമിക വിവരം.
കൂടുതൽ ആളുകൾ കുടുങ്ങിയോയെന്ന കാര്യവും പരിശോധിക്കുന്നുണ്ട്. ഉച്ചഭക്ഷണം കഴിച്ച് ഷിഫ്റ്റ് പ്രകാരം ജോലിക്ക് കയറിയവരാണ് അപകടത്തിൽ പെട്ടത്. അപകടം നടന്ന സ്ഥലത്തേക്ക് എത്തിച്ചേരുക ഏറെ പ്രയാസകരമാണ്.പാറക്കെട്ടുകൾക്കിടയിൽ കാലുകൾ കാണാം എന്ന് ദൃക്‌സാക്ഷികൾ പറയുന്നു. പാറ ഇടിയുന്നതിനാൽ ഇവിടേയ്ക്ക് എത്തി ചേരാൻ പ്രയാസമാണ്.
വലിയ ഒരു പാറ നിൽക്കുന്നതിന്റെ മറുവശത്താണ് ആളുകൾ കുടുങ്ങിക്കിടക്കുന്നത് എന്നാണ് വിവരം . പാറ മാറ്റിയാൽ മാത്രമേ ആളുകളെ പുറത്തെടുക്കാൻ സാധിക്കു.പാറമടയിലെ സുരക്ഷാമാനദണ്ഡങ്ങൾ കൃത്യമായി പാലിച്ചിരുന്നില്ല എന്ന് നാട്ടുകാർ പറയുന്നു.
വിവരമറിഞ്ഞ് പൊലീസും ഫയർ ഫോഴ്‌സും അടക്കം ഇവിടെയെത്തിയെങ്കിലും ഹിറ്റാച്ചിയുടെ അടുത്തേക്ക് പോകാൻ സാധിച്ചിട്ടില്ല.എൻ ഡി ആർ എഫ് സംഘം അപകട സ്ഥലത്തേക്ക് എത്തിച്ചേരും എന്നാണ് വിവരം . സ്ഥലത്തുള്ള ഫയർ ഫോഴ്സിന് രക്ഷാപ്രവർത്തനം നടത്താൻ സാധിക്കാത്തവിധം ദുഷ്‌കരമാണ് പാറമടയിലെ സ്ഥിതി .ചവിട്ടുന്ന പ്രദേശം ഇടിഞ്ഞു വീഴുന്ന അവസ്ഥയാണ്.
