ബാഗ്ദാദ്: ഇറാഖിൽ ഷോപ്പിംഗ് സെന്ററിലുണ്ടായ ദാരുണമായ തീപിടുത്തത്തിൽ 61 പേർ കൊല്ലപ്പെട്ടു. കിഴക്കൻ ഇറാഖിലെ അൽ-കുട്ട് നഗരത്തിലാണ് തീപിടിത്തം. സംഭവത്തിൽ നിരവധി പേർക്ക് പരിക്കേറ്റു. . മരണ സംഖ്യ ഇനിയും ഉയരാനാണ് സാധ്യതയെന്ന് വാസിത് പ്രവിശ്യയുടെ ഗവർണർ മുഹമ്മദ് അൽ-മിയാഹി പറഞ്ഞു. രക്ഷാപ്രവർത്തനം പുരോഗമിക്കുകയാണ് അഞ്ചുനില കെട്ടിടത്തിലായിരുന്നു തീപിടിത്തം.തീപിടിത്തത്തിന്റെ കാരണം ഇതുവരെ വ്യക്തമായിട്ടില്ല.അപകടത്തില്‍ 45 പേരെ സിവില്‍ ഡിഫന്‍സ് സംഘം രക്ഷപ്പെടുത്തിയതായി ഇറാഖ് ആഭ്യന്തര മന്ത്രാലയം അറിയിച്ചു. മരിച്ച 61 പേരില്‍ ഒരാളുടെ മൃതശരീരം തിരിച്ചറിഞ്ഞിട്ടില്ല . പുക ശ്വസിച്ചാണ് മിക്കവരുടെയും മരണം സംഭവിച്ചിരിക്കുന്നത്.
പ്രാഥമിക അന്വേഷണ റിപ്പോർട്ട് രണ്ട് ദിവസത്തിനുള്ളിൽ പുറത്തുവിടുമെന്ന് ഇറാൻ സ്റ്റേറ്റ് ന്യൂസ് ഏജൻസിയായ ഐഎൻഎ റിപ്പോർട്ട് ചെയ്തു. കെട്ടിട ഉടമയ്‌ക്കെതിരെ കേസ് ഫയൽ ചെയ്തിട്ടുണ്ടെന്ന് ഗവർണറെ ഉദ്ധരിച്ച് ഐഎൻഎ റിപ്പോർട്ട് ചെയ്തിട്ടുണ്ട്. ബാഗ്ദാദിൽ നിന്ന് 160 കിലോമീറ്റർ തെക്കുകിഴക്കായി സ്ഥിതി ചെയ്യുന്ന വിശാലമായ വാണിജ്യ സമുച്ചയമായ ഹൈപ്പർ മാളിന്റെ ഒന്നാം നിലയിലാണ് തീപിടുത്തം ആരംഭിച്ചതെന്ന് റിപ്പോർട്ടുണ്ട്. പ്രാഥമിക റിപ്പോർട്ടുകൾ വൈദ്യുത തകരാറിലേക്ക് വിരൽ ചൂണ്ടുന്നുണ്ടെങ്കിലും ഉദ്യോഗസ്ഥർ സ്ഥിരീകരിച്ചിട്ടില്ല .
മേഖലയിലെ വികസനത്തിന്റെ നാഴികകല്ല് എന്ന് വിശേഷിപ്പിക്കപ്പെട്ട സെന്ററിലാണ് ദുരന്തം സംഭവിച്ചിരിക്കുന്നത്. അപകടം സംഭവിക്കുന്നതിന് അഞ്ച് ദിവസത്തിന് മുമ്പ് മാത്രമാണ് പ്രവർത്തനം തുടങ്ങിയത്. വസിത് പ്രവിശ്യയിലുടനീളം മൂന്ന് ദിവസത്തെ ദുഃഖാചരണം പ്രഖ്യാപിച്ച ഗവർണർ മിയാഹി, മാളിന്റെ മാനേജ്‌മെന്റിനും ഉടമസ്ഥനുമെതിരെ നിയമനടപടി സ്വീകരിക്കുമെന്ന് അറിയിച്ചു.
പുതുതായി നിർമ്മിച്ച മാളിന്റെ ഘടന അഗ്നി സുരക്ഷാ മാനദണ്ഡങ്ങൾ പാലിക്കുന്നുണ്ടോ എന്ന് കണ്ടെത്താൻ അന്വേഷണത്തിന് ഉത്തരവിട്ടിട്ടുണ്ട്, അടിയന്തര എക്സിറ്റുകളുടെയും അഗ്നി പ്രതിരോധ സംവിധാനങ്ങളുടെയും പര്യാപ്തതയെക്കുറിച്ച് ഇതിനകം തന്നെ ഗുരുതരമായ ചോദ്യങ്ങൾ ഉയർന്നുവന്നിട്ടുണ്ട്. ഈ ദുരന്തം ഇറാഖിലുടനീളം വ്യാപകമായ പ്രതിഷേധത്തിന് കാരണമായിട്ടുണ്ട്, സ്വകാര്യ വാണിജ്യ വികസനങ്ങളിൽ, പ്രത്യേകിച്ച് വലിയ ജനക്കൂട്ടത്തെ പരിപാലിക്കുന്നവയിൽ, കർശനമായ മേൽനോട്ടം വഹിക്കണമെന്ന ആവശ്യം ഉയർന്നുവന്നിട്ടുണ്ട്.
