കറുത്തമ്മയും പരീക്കുട്ടിയും മലയാളിക്ക് ഒരിക്കലും മറക്കാനാകാത്ത പ്രണയജോഡികള്‍. അഭ്രപാളിയിലെ അനശ്വരകാവ്യത്തിലെ നായിക ഷീല മധുവിനെക്കുറിച്ചു മുമ്പൊരു അഭിമുഖത്തില്‍ പറഞ്ഞത് മധു എന്ന മഹാനടന്റെ വ്യക്തിജീവിതത്തിലെ നന്മകളെക്കുറിച്ചാണ്. ജീവിതത്തെക്കുറിച്ച് വളരെ വ്യത്യസ്തമായ കാഴ്ചപ്പാടുകള്‍ പുലര്‍ത്തുന്ന ആളാണ് മലയാളത്തിന്റെ ഇതിഹാസതാരം മധുവെന്നാണ് ഷീല പറഞ്ഞത്. സഹപ്രവര്‍ത്തകരുടെ സന്തോഷത്തിലും വേദനയിലും എപ്പോഴും അദ്ദേഹമുണ്ടാവുമെന്നും നിത്യഹരിത നായിക പറഞ്ഞു. ഷീലയുടെ വാക്കുകള്‍:
വാക്കുകൊണ്ടുപോലും സൗഹൃദങ്ങളില്‍ ഒരകല്‍ച്ച അദ്ദേഹം സൃഷ്ടിക്കില്ല. പതിറ്റാണ്ടുകളായി തുടരുന്ന ഞങ്ങളുടെ സൗഹൃദം ഇന്നും തുടരുന്നു. മധു സാര്‍ മലയാളി സമൂഹത്തിന്റെ മനസാക്ഷി കൈയിലെടുത്ത മഹാപ്രതിഭതന്നെയാണ് എന്നതില്‍ ആര്‍ക്കും സംശയമില്ല. ഒരുപാട് കഥാപാത്രങ്ങളെ മനോഹരമായി എനിക്ക് അവതരിപ്പിക്കാന്‍ കഴിഞ്ഞത് സത്യന്‍ മാഷിന്റെയും നസീര്‍ സാറിന്റെയും മധു സാറിന്റെയുമൊക്കെ സപ്പോര്‍ട്ട് ഒന്നുകൊണ്ടുമാത്രമാണ്.
മധു സാറിനെ ഓര്‍ക്കുമ്പോാള്‍ പരീക്കുട്ടിയും ഷീലയെ ഓര്‍ക്കുമ്പോള്‍ കറുത്തമ്മയും പ്രേക്ഷകന്റെ മനസില്‍ തെളിയുന്നത് ആ കഥാപാത്രങ്ങളുടെ ശക്തികൊണ്ടുതന്നെയാണ്. പ്രണയവും വിരഹവും ദുരന്തവും നിറഞ്ഞ കറുത്തമ്മയുടെയും പരീക്കുട്ടിയുടെയും ജീവിതം മധുസാറിനൊപ്പം അഭിനയിക്കാന്‍ കഴിഞ്ഞത് എന്റെ ചലച്ചിത്ര ജീവിതത്തിലെ ഏറ്റവും വലിയ ഭാഗ്യമാണ്. മലയാള സിനിമയുടെ ചരിത്രം മാറ്റിയെഴുതിയ ചിത്രമായിരുന്നു ചെമ്മീന്‍.
സത്യന്‍, പ്രേംനസീര്‍ എന്നീ രണ്ട് നായകന്മാരായിരുന്നു അന്നത്തെ പ്രമുഖ താരങ്ങള്‍. അവര്‍ക്കിടയിലേക്ക് മറ്റൊരു നായകന്‍ കൂടി കടന്നുവരുകയായിരുന്നു. മലയാളത്തിന് ലഭിച്ച ആ രണ്ട് വലിയ നടന്മാരും ജന്മം കൊണ്ട് തിരുവനന്തപുരംകാരായിരുന്നു. മൂന്നാമനായെത്തിയ മധു എന്ന മെലിഞ്ഞ് നീണ്ടുയരമുള്ള നടനും തിരുവനന്തപുരംകാരന്‍ തന്നെയായി എന്നതും മറ്റൊരു ചരിത്രം. ഒട്ടേറെ വിജയചിത്രങ്ങളിലും പരാജയചിത്രങ്ങളിലും ഞങ്ങളുടെ ജോഡി തുടരുകയുണ്ടായി- ഷീല പറഞ്ഞു.
