പിരമിഡ് എന്നു കേള്‍ക്കുമ്പോള്‍ മനസില്‍ ആദ്യം കടന്നുവരുന്ന രാജ്യം ഈജിപ്റ്റായിരിക്കും. ശരിയാണ്, മനോഹരമായ പിരമിഡുകള്‍ക്കു പേരുകേട്ട രാജ്യം! ഏറ്റവും കൂടുതല്‍ പിരമിഡുകള്‍ ഉള്ള രാജ്യവും ഈജിപ്റ്റ് ആണെന്നാണു നമ്മള്‍ കരുതിയിരിക്കുന്നത്. എന്നാല്‍ ഏറ്റവും കൂടുതല്‍ പിരമിഡുകള്‍ ഉള്ള രാജ്യം ഈജിപ്തല്ലെന്നു നിങ്ങള്‍ക്കറിയാമോ അതെ, നിങ്ങള്‍ വായിച്ചത് ശരിയാണ്. ലോകത്ത് ഏറ്റവും കൂടുതല്‍ പിരമിഡുകള്‍ ഉള്ള രാജ്യം സുഡാന്‍ ആണ്.
സുഡാന്റെ വിശാലമായ മരുപ്രദേശങ്ങളില്‍ 220-240 ാളം ചിതറിക്കിടക്കുന്ന ഭീമാകാരമായ ഘടനകള്‍ ഉണ്ട്. സുഡാനിലെ പിരമിഡുകള്‍ പല പ്രദേശങ്ങളിലായി വ്യാപിച്ചുകിടക്കുന്നു. അവരുടേതായ തനതായ വാസ്തുവിദ്യാ ശൈലിയും ചരിത്രപരമായ പ്രാധാന്യവും ആ പിരമിഡുകള്‍ക്കുണ്ട്. സുഡാനിലൂടെ ഒഴുകുന്ന നൈല്‍ നദിയുടെ കിഴക്കന്‍ തീരത്തു കാണപ്പെടുന്ന നുബിയന്‍ മെറോ പിരമിഡുകള്‍, ചെറുതാണെങ്കിലും ഈജിപ്ഷ്യന്‍ പിരമിഡുകള്‍ പോലെ പ്രശസ്തമാണ്. 2500 ബിസിഇ 300 സിഇക്കും ഇടയില്‍ കുഷൈറ്റ് ഭരണകാലത്താണ് നുബിയന്‍ പിരമിഡുകള്‍ നിര്‍മിച്ചത്.
കുത്തനെയുള്ള വശങ്ങളും മൂര്‍ച്ചയുള്ള കോണുകളും ഉള്‍ക്കൊള്ളുന്നതാണ് നുബിയന്‍ മെറോ പിരമിഡ്. അവയില്‍ ഏറ്റവും പ്രശസ്തമായത് യുനെസ്‌കോയുടെ ലോക പൈതൃക സൈറ്റായ മെറോ നെക്രോപോളിസ് ആണ്. 200ലധികം പിരമിഡുകള്‍ അവിടെ നിശബ്ദ കാവല്‍ക്കാരായി നിലകൊള്ളുന്നു. പിരമിഡുകള്‍ ഈജിപ്തിലെന്നപോലെ സുഡാനിലും രാജകീയ ശവകുടീരങ്ങളാണ്. കുഷൈറ്റ് ഭരണാധികാരികളുടെ ജീവിതത്തിലേക്കും ആചാരാനുഷ്ഠാനങ്ങളിലേക്കും നേര്‍ക്കാഴ്ച നല്‍കുന്നാണ് പിരമിഡുകള്‍.
ഏറ്റവും കൂടുതല്‍ പിരമിഡുകള്‍ ഉണ്ടെങ്കിലും, സുഡാനീസ് പിരമിഡുകള്‍ ഈജിപ്ഷ്യന്‍ പിരമിഡുകളെപ്പോലെ പ്രശസ്തമല്ല. അങ്ങോട്ടെത്തുന്ന സഞ്ചാരികളുടെ എണ്ണവും കുറവാണ്.
