ലോക്‌സഭയിലേക്കും നാല് സംസ്ഥാന നിയമസഭകളിലേക്കും കഴിഞ്ഞ വര്‍ഷം നടന്ന തെരഞ്ഞെടുപ്പില്‍ രാഷ്ട്രീയ പാര്‍ട്ടികള്‍ ശേഖരിച്ച ഫണ്ടിന്റെ കണക്കുകള്‍ പുറത്തുവന്നു. ബിജെപി 6,268 കോടി രൂപയാണ് ഇലക്ഷന്‍ ഫണ്ടിലേക്ക് സമാഹരിച്ചത്. തൊട്ടുപിന്നില്‍ നില്‍ക്കുന്ന കോണ്‍ഗ്രസിന് ലഭിച്ചത് 592.5 കോടി രൂപ. ബിജെപി 1,493 കോടി രൂപ ചെലവിട്ടപ്പോള്‍ കോണ്‍ഗ്രസ് ചെലവാക്കിയത് 620 കോടിയാണ്.
ദേശീയപ്പാര്‍ട്ടികള്‍ക്ക് ആകെ ലഭിച്ചത് 6,930 കോടി രൂപ. സിപിഎമ്മിന് 62.75 കോടി ലഭിക്കുകയും 16.53 കോടി ചെലവിടുകയും ചെയ്തു. എഎപിക്ക് 6.89 കോടി ലഭിച്ചു. 7.54 കോടി ചെലവഴിച്ചു. ബിഎസ്പിക്ക് ഒന്നും കിട്ടിയതായി പറയുന്നില്ലെങ്കിലും ചെലവിട്ടത് 66 കോടിയാണ്.
പ്രാദേശികപ്പാര്‍ട്ടികളില്‍ ഏറ്റവും കൂടുതല്‍ ഫണ്ട് ലഭിച്ചത് വൈഎസ്ആര്‍ കോണ്‍ഗ്രസിനാണ്. 171 കോടി. 325 കോടി ചെലവിട്ടു. ടിഡിപിക്ക് 108 കോടി, ബിജെഡിക്ക് 60, ബിആര്‍എസിന് 47.5, തൃണമൂല്‍ കോണ്‍ഗ്രസിന് 33, ഡിഎംകെയ്ക്ക് 26.5, ജെഡിയു 19.5, എഐഎഡിഎംകെ 11, എസ്പി 10.4, ആര്‍ജെഡി 1.76 കോടി എന്നിങ്ങനെ ലഭിച്ചു.
ഡിഎംകെ 145.6 കോടി, ബിജെഡി 278, ബിആര്‍എസ് 103, തൃണമൂല്‍ കോണ്‍ഗ്രസ് 147.6, ടിഡിപി 34.25, എഐഎഡിഎംകെ 23.3, ജെഡിയു 22.8, എസ്പി 48.4, ആര്‍ജെഡി 3.23 കോടി എന്നിങ്ങനെ ചെലവഴിച്ചു. പാര്‍ട്ടികള്‍ക്ക് പണമായും ചെക്കായും ഡിഡിയായും ലഭിച്ച തുകയും അത് ചെലവഴിച്ചതിന്റെ കണക്കും തിരഞ്ഞെടുപ്പ് കമ്മിഷനെ അറിയിച്ചതിനെ അടിസ്ഥാനമാക്കി അസോസിയേഷന്‍ ഫോര്‍ ഡെമോക്രാറ്റിക് റിഫോംസ് (എഡിആര്‍) സംഘടനയാണ് റിപ്പോര്‍ട്ട് തയ്യാറാക്കിയത്.
തെരഞ്ഞെടുപ്പിന് രാഷ്ട്രീയ പാര്‍ട്ടികള്‍ സമാഹരിച്ചത് 6930 കോടി; 6268 കോടിയും നേടി ബിജെപി, കോണ്‍ഗ്രസിന് 592 കോടി
