തൃശൂരിലെ അക്കികാവ് – കേച്ചേരി ബൈപാസില്‍ പന്നിത്തടം ജംക്ഷനില്‍ ലോറി കെ എസ് ആര്‍ ടി സി ബസ്സിലിടിച്ചുണ്ടായ അപകടത്തില്‍ 12 പേര്‍ക്ക് പരിക്ക്.. മീന്‍ കയറ്റി വരികയായിരുന്ന ലോറിയും കോഴിക്കോട് നിന്ന് കുമളിയിലേക്ക് പോകുകയായിരുന്ന കെഎസ്ആര്‍ടിസി ശബരി ബസുമാണ് കൂട്ടിയിടിച്ചത്. പരിക്കേറ്റ മൂന്ന് പേരുടെ നില ഗുരുതരമാണെന്നാണ് വിവരം. ഇടിയുടെ ആഘാതത്തില്‍ റോഡിലേക്ക് തെറിച്ചുവീണ കെ എസ് ആര്‍ ടി സി ഡ്രൈവറുടെ ആരോഗ്യനിലയും ഗുരുതരമാണ്.
പുലര്‍ച്ചെ 1.30 ഓടെ ആയിരുന്നു അപകടം. കുന്നംകുളത്തു നിന്ന് ചെറുതുരുത്തിയിലേക്ക് മത്സ്യവുമായി പോകുകയായിരുന്ന ലോറി പന്നിത്തടം ജംക്ഷന് സമീപത്ത് വെച്ചാണ് ബസ്സിലിടിക്കുന്നത്. കുന്നംകുളം – വടക്കാഞ്ചേരി സംസ്ഥാന പാതയിലൂടെ വന്ന ലോറി അമിത വേഗതയില്‍ ആയിരുന്നു. ഇടിയുടെ ആഘാതത്തില്‍ രണ്ടു വാഹനങ്ങളും ജംക്ഷനിലെ രണ്ടു കടകളുടെ മുന്‍വശത്തേക്ക് ഇടിച്ചു കയറിയാണു നിന്നത്. രണ്ടു വാഹനങ്ങളുടെയും മുന്‍ഭാഗം പൂര്‍ണമായി തകര്‍ന്നു.
അക്കിക്കാവ് – കേച്ചേരി ബൈപ്പാസില്‍ ലോറി ബസ്സിലിടിച്ച് അപകടം; പന്ത്രണ്ട് പേര്‍ക്ക് പരിക്ക്
